Çdo person i rritur bën mirë të lidhë një kontratë për sigurim privat të përgjegjësisë ndaj palëve të treta. Ky i merr përsipër shpenzimet, kur i siguruari pa dashje i shkakton dëm dikujt.
Kur dikush lëndon një person tjetër apo dëmton një send, që i takon një personi tjetër, ai mban përgjegjësinë financiare për këtë veprim. Kjo vlen edhe atëherë, kur dëmi nuk është shkaktuar me qëllim. Shpenzimet mund të jenë shumë të larta. Kur dikush për shembull lëndon dike gjatë ngasjes së skive, dëmi mund të shkojë në qindra mijëra franga.
Për mos hyrë në vështirësi financiare në rastin e një dëmi, nevojitet një sigurim privat i përgjegjësisë ndaj palëve të treta (Privathaftpflichtversicherung). Ky ofrohet prej shumicës e kompanive private të sigurimit. Sigurimet private të përgjegjësisë ndaj palëve të treta shpesh mund të lidhen bashkërisht për të gjithë personat, që jetojnë bashkë në një njësi shtëpiake. Ky sigurim nuk është i obligueshëm, por rekomandohet me patjetër.
Sigurimi privat i përgjegjësisë ndaj palëve të treta i mbulon dëmet materiale dhe dëmet në persona, të cilat një person i siguruar i ka shkakton një tjetri. Këtu hyjnë për shembull shpenzimet për riparim, shpenzimet për shërim, zhdëmtimet për humbje rroge apo para për dhimbjet e shkaktuara. Sigurimi privat i përgjegjësisë ndaj palëve të treta i mbulon edhe shpenzimet dhe dëmet, të cilat i shkaktojnë shtazët e caktuara shtëpiake. Sigurimi nuk paguan për dëmet, që dikush i shkakton personave, me të cilët ai jeton së bashku në njësinë shtëpiake. Nuk mbulohen edhe shpenzimet, që dikush i shkakton me qëllim apo nga pakujdesia e rënde.
ch.ch / Më shumë informacione (DE)
